Norway kumpi gama hong zin Daw Aung San Suu Kyi ii Nobel Price pahtawina laakna 16-06-2012 Nino ni/ Kigin ni Oslo program pi sungah Norway gama tung Zomi te zong Pasian makaihna lam honsakna tawh honkhat mah ka na ki hel thei uh hi. Haksatna tuamtuam tampi leh ki ho theihna hun omlo leh lampi omlo lakah Zomi min tawh puandum khat ama khut tungah kipia thei aa, lungdam takin hong na sansak banah, Pu Chin Sian Thang kiangah ka tun peuh teh ka na ngen ning ci ahih manin ki lungdamin tha kingah tuam mahmah hi.
Hih puandum pen Zomite a om thei tengin sum kikhawnkhawm in Norway sum 1000 in ki lei-a, hici banga pankhopna tawh i piak khaktheihna zong Pasian in lampi hong honsak man bek hi cih phawkin i ki angtanpih mahmah uh hi. Kiphal taka a piakhiate tungah Topan thupha hong piak sak ta hen. Oslo ah ASSK dawnna Committe sunga ki hel Pa Khai, Bergen pan Nuampi te zong Zomi min tawh i angtan pih mahmah hi.
Tualo hun leh sum leh paai bei-a Zomi min a dinpih hih hun a uap khempeuh tungah zong Zomi min tawh i lungdam mahmah aa, i angtan pihna i pulaak nuam hi. Hong ki hel zolo khempeuh zong Pasian in i minam thupha hong piak sak ta hen. Oslo pan zinte kisapna omlo-a thusiam taka hong zindo Zomi innteekte a diakin Mangpite innkuan leh Oslo Zomi khempeuhte tungah zong Zomi min tawh lungdam thu i ko hi.
ASSK thungenna sungah Kawlgam sunga om minam tuamtuamte kikal-ah daihna, ki it kilemna hong om theihna ding, gammi khempeuh in suakta taka thumaanna tawh i gam sungah nasem-a i nuntak kimtheihna ding, i gam pen mikhempeuhte khamuang taka i nuntakna, suakta taka i sungtum pusuah theihna i innpi ahih theihnading na a sem i hi hi. Pilna sin na, sum leh paai zonnate ah khantohna maalakna a om theihna ding, khat leh khat kikal kizahtakna tawh mihingte ngah ding kilawm hamphatnate thusim in, tuate i ngahkim theihna ding .... sepding tampite sep a kipan pan ding ihi hi ci hi.
Bergen khuapi ah 17-06-2012 Nipi ni nitaklam in Kawlgam mite tawh kimuh khopna hun ki zanga, tua pan zong ZNC-LA min mah tawh Zomi te-in puandum aneute khat kipia lai ahi hi. Tua ah zong Zomi te a ding phatuam ngaite piakkhiat hi aa, a piakhiate tungah i lungdam mahmah hi. Minamdangte pen USA; Canada, Japan, Australia, leh Denmark, Sweden, Germany, France, Europe gam tuamtuam pan hong paikhawm uh hi.
Aung San Suu Kyi thungenna hunpi bawlna inn sungah mi 1000 ki lut thei hi-aa, Norway Zomi upa (3); Pu Pum Za Chin, Pu Thang Khan Thawn, Pu Khuppi cihteng banah Germany pan hong pai Pa Khai zong va ki hel thei hi cih ki nung zak aa, ki lungdam mahmah hi. Thu ki theihtuah ding deihna hi. Gelh nop tampi om mah ta leh tuazah ciphot ni. Gelhding kilawm gelhkhakloh leh gelhkhial a om leh hong na maisak un. Zomi khempeuh Topan i mailam hong honsak-a Pasian leh i minam itna tawh panngamna, nahoih sepngamna, ki-it kilem kithutuah theihna thuphate hong pia hen.
Mante tawmkhat zong attachment file ah hong khak ingh.
Pasian Gam leh minam a ding thungetna pan,
tktsuante
Trondheim, Midt Norway
0 comments:
Post a Comment